Gnef

Fint in Venit par bevi un Tai

Fri, 26 Sep 2008 12:13:00 -0400

Insome al è uficiâl: di vuê il non Tocai no si pues plui doprâlu.

Il biel al è che in Friûl al si clamarà cuntun non talian - “Friulano” - ancje di dificil pronuncie (ducj zà a atchin a dî “Firulano”), e in Venit cuntun non furlan: “TAI”.

Complimentons ai nestris sorestans: brâfs, propit! Ma lait…

Patrie di Setembar

Tue, 16 Sep 2008 16:47:00 -0400

Al è jessût il gnûf numar di «Patrie dal Friûl». Frasis “top”:

Luigina Battistutta: George Steiner in “Dopo Babele” (ed. Garzanti), al dîs che ogni lenghe «e forme une schirie di monts pussibii e di gjeografiis de memorie»: cuant che une lenghe e sparìs, al sparìs un mont pussibil. La sfurlanizazion le consideri une specie di suicidi coletîf. Si fasìn sostituî la nestre “gjeografie de memorie” di une fate dai media, rivade di cuissà dulà e che no nus corispuint e che nus ven imponude, probabil par imponinus altri.

Tarcisio Mizzau: Par sierâ cheste piçule presentazion di un libri cussì impuartant, o dopri une citazion dal premi Nobel H. Böll, in particolâr in onôr di Pierluigi Visintin, mancjât masse adore: “Nol esist un mût plui nobil, par dâ testemonenace di partignî a un popul, di chel di scrivi te sô lenghe”. O di voltâ un poeme imortâl come la Odissee, par che la sô int e podedi caturânt la anime.

Pre Tonin Cjapielâr: Vino di ridusi pre Antoni, par fâlu deventâ cualchidun, a jessi let par talian? (…)
No stin a fâ passâ il talian come une grande operazion culturâl. A pensâle ben, no lu è nancje l’inglês. No stin a lâ a cirî grandecis fûr de nestre tiere, tradint il nestri patrimoni.

Udin capitâl? Sumosù

Mon, 15 Sep 2008 08:34:00 -0400

Fâ deventâ Udin “capitâl dal Friûl” (ma cence sintî ce che pensin Gurizze e Pordenon) al è stât il slogan de campagne eletorâl pal Comun. Ma che al sedi stât nome un slogan, che Udin e je une provincie de Italie e no une capitâl di un teritori, lu conferme chest filmât. I sorestans di Udin a son distants agns lûs dal teritori furlan: cjârs sindic e vice, il calciadôr miôr dal mont…

AL E’ ZICO!!!

Events impierdibii

Sun, 14 Sep 2008 13:24:57 -0400

Nol è Friuli Doc cence i Gnognosaurs…

Une cuestion di imagjine

Wed, 10 Sep 2008 12:52:52 -0400

Metìn che usgnot si zuiàs Georgia-Italia (se no fos la tragedie de vuere di chêst bandis), impen che Italia-Georgia. Imagjinait di impiâ il tv television par cjalâ la partide e viodi une robe cussì. Ce pensaressiso di chel paîs?

Gnovis jevis

Sun, 07 Sep 2008 17:03:54 -0400

Il Pape al à vût dit che a covente une gnove gjarnazie di politics catolics, competents e cun rigôr morâl.

Vonde putanîrs, alore?

La Venere cjargnele si clame Athina

Sat, 06 Sep 2008 12:35:00 -0400

La cjargnele di Davâr Athina Covassi, Miss Friûl e ancje VJ, e à concuistât ducj i furlans cun la sô muse biele e sclete. E à vût dit che e partìs par Salsomaggiore ancje par promovi la sô Cjarge. Bule!

Al pâr però che e plasi ancje ai talians: e je ben metude in classifiche li dal sondaç dal Corriere

Medais d'aur vêr

Wed, 13 Aug 2008 14:06:00 -0400

Cumò i atletis medaiâts a volaressin la detassazion dal lôr premi. Inanzidut a smentein che la plui part di lôr a son mantignûts dal stât (Tomba il carbinîr tropis voltis aial fat servizi? E la nestre Manu te Forestâl?). Podopo, se a mertin, painju di plui, ma no creìn privilegjis, ancje se al è - chel sì - un tipic sport talian.

Jo o ai une atre propueste: detassìn il stipendi di cui che al si ocupe di vecjios o handicapâts. Di chei li sì che o soi braurôs!!!

Patrie on line

Sun, 10 Aug 2008 10:33:00 -0400

E je jessude La Patrie dal Friûl di avost. Il storic mensîl dut par furlan, vie pe setemane al è rivât tes cjasis dai abonâts e tes miôr ediculis (venastai ches che lu domandin diu vêlu). Di vuê si cjatilu ancje disponibil on line sul sît.

Teme dal speciâl, che al tache cuntune interviste al ciclist Pellizzotti, il sport.

Euregjion

Thu, 07 Aug 2008 18:09:00 -0400

Vuê a buinore as 10 e mieze a Triest si presente il numar de riviste su la euroregion «Euregio». I redatôrs a distribuiran numars dal sfuei ai presints.

Bon, us ai visâts tart par lâ, però on line si pues cjatâle in pdf par talian, sloven, todesc e inglês. Dentri, une interviste a dj Tubet.

Catalians

Mon, 04 Aug 2008 12:33:00 -0400

Al è nassût il prin cuotidian talian on line in lenghe catalane. Screât uficiualmentri ai 2 di avost al à bielzà fat scjas in gracie dal passe peraule li di blog e sîts catalans.

(Gnove vie minoranzelinguistiche provincie di Tn)

Strambitâts di tutele

Sun, 03 Aug 2008 13:23:00 -0400

Po ben ce stramp: la Carfagna dal Pdl si cjape tancj compliments pe sô intenzion di screâ un garant dai minôrs a nivel talian, invesit in Friûl - li che al jere - il Pdl lu gjave parcè che e je une spese inutil…

Insumis, par fortune che il Ministeri Pari Opportunità al è cence portafoglio, parcè che se si tocje chel, i dirits a puedin spietâ…

Balon e braure

Sat, 02 Aug 2008 09:09:00 -0400

Ve ca la diference jenfri une grande scuadre di balon che a sa di rapresentâ un teritori e une che no nd congnòs nancje i simbui.

Se o ai di tifâ une scuadre che no je furlane, o tifarai Inter, Juve o Milan: almancul chês e vincin alc…

Anzit: olè Barça e Atletic Bilbao!!!

Tecnologjornalisim

Thu, 31 Jul 2008 13:24:00 -0400

Segont vualtris chest gjornalist aial capît ce isal il gnûf sisteme opertîf di Microsoft «Midori» o al à nome copiât ca e là cualchi comunicât stampe?

Assenteisim public

Thu, 31 Jul 2008 09:11:00 -0400

Daûr di un scandai de Inps regjonâl, a mai e jugn di chest an l’assenteisim al è lât in mancul dal 30%. Tal setôr dai dipendents publics regjonâi, la provincie di Triest e je insomp ae clasifiche cun 29 dîs di medie di assince, daûr di jê Gurizze (23 dîs), Udin (20) e Pordenon (17).

Come dî che, pe meritocrazie, di cumò indevant se si à di viarzi un ufici public regjonâl, prime di vares di fâlu a Pordenon, dopo a Udin, e vie indevant.

(te foto, dipendent public che al duar sul puest di vore)

Dâ i numars

Wed, 30 Jul 2008 09:41:42 -0400

La matematiche (e i conts) no son une opinion? O ai simpri plui dubis.

Daûr di une ricerche dal Sole24ore la universitât di Triest e vignive fûr tant che la miôr d’Italie. Ma o savìn ancje che e je la cuinte universitât sovrastimade par contribûts.

E cumò cun cheste atre inchieste dal “Soreli” (di lunis ai 28) o savìn ancje che TS al va fûr dai limits di leç cui stipendis…

Mah!

Un peta nus salvarà

Mon, 28 Jul 2008 11:17:00 -0400

Il Petabyte no mi pareve cheste grande robe (o vês di capîmi), ma al samee che al puartarà a la formazion di nuie di mancul che un gnûf metodo sientific!

No sai se jessi plui scaturît di cheste gnove rivoluzionarie o dal fat che o ai capît dut leint il gangherologo...

Risolt il probleme dai precaris

Sun, 27 Jul 2008 09:41:00 -0400

Finalmentri si è rivâts insomp ae brute facende dai precaris.

Vonde cul precariât: e nas la sclavitût!

Çampe cachemire

Sat, 26 Jul 2008 16:23:29 -0400

Bertinotti al congres di Rifondazion Comuniste

«Si à di tovnâ a pavtî dai opevavis!»

Gùgol nus rint stupits? Boh?

Sat, 26 Jul 2008 15:33:00 -0400

Al mi capitât sot man il numar di Internazionale cul articul «Google ci rende stupidi» voltât dal origjinâl di Nicholas Carr. Al à di jessi interessant, ma no lu ai let, che al è masse lunc…